Reddit sërish fiton kundër industrisë së filmit, nuk do të duhet të zbulojë IP adresat e “piratëve”

Në betejën e fundit gjyqësore midis industrisë së filmit dhe forumit të njohur të internetit, Reddit ka arritur edhe një herë të mbrojë privatësinë e përdoruesve të tij.

Gjykata e Qarkut e SHBA-së për Distriktin Verior të Californisë mohoi kërkesën e industrisë së filmit për të zbuluar IP adresat të përdoruesve të Reddit për pirateri.

Kompanitë e industrisë së filmit Voltage Holdings dhe Screen Media Ventures, në aksionin e tyre të tretë, i kanë kërkuar Reddit të dorëzojë IP adresat të gjashtë përdoruesve gjatë një periudhe shtatëvjeçare, duke argumentuar se përdoruesit nuk kanë të drejtë për privatësi kur bëhet fjalë për adresat e tyre IP.

Megjithatë, gjykatësi Thomas Hickson e hodhi poshtë këtë kërkesë, duke deklaruar se nuk ka asnjë arsye për të besuar se zbulimi i adresave IP nuk i nënshtrohet mbrojtjes së Amendamentit të Parë të Kushtetutës së SHBA për të drejtën e anonimitetit.

Rasti, i njohur si Reddit III, pason dy raste të mëparshme në të cilat kërkesa të ngjashme nga industria e filmit gjithashtu u refuzuan. Argumenti i Reddit se informacioni i kërkuar nga këto kompani është i disponueshëm nga ofruesi i shërbimit të internetit Frontier Communications, si dhe nga vetë abonentët e Frontier, gjeti mbështetje në vendimin e gjykatës.

Reddit arriti të argumentojë se duhet të zbatohet një standard më i lartë kur bëhet fjalë për “zbulimin e dëshmitarëve jo-palë” sesa të pandehurit e mundshëm, duke pasur parasysh se procedurat ligjore shpesh mund të vazhdojnë pa shkelur të drejtën e anonimitetit të dëshmitarit. Gjykatësi Hickson theksoi rëndësinë e mbrojtjes së të drejtës së Amendamentit të Parë për anonimitetin, si dhe të drejtën e platformave si Reddit për të mbrojtur ato të drejta të përdoruesve të tyre.

Përveç kësaj, Hickson theksoi se kompanitë nuk arritën të provonin se informacioni që ata po kërkonin nuk mund të merret nga burime të tjera, gjë që mbështet më tej vendimin për refuzimin e kërkesës.

Ky rast përfaqëson një tjetër fitore për privatësinë e përdoruesit në internet. Ndërsa kompanitë e industrisë së filmit vazhdojnë luftën e tyre kundër piraterisë, këto vendime gjyqësore e bëjnë të qartë se qasja për të luftuar piraterinë duhet të balancohet me respektimin e të drejtave për privatësi dhe lirinë e shprehjes. /Telegrafi/